香港新浪網 MySinaBlog
« 上一篇 | 下一篇 »
剛仔 | 12th Aug 2006 | 一般 | (1889 Reads)

平均分: 10.00 | 評分人數: 1
蛇王孫子兵法 — 「蛇王三十六計」下篇
上篇係唔係好精彩呢?戲肉仲未到!睇埋呢十八計,包你有運行啦!

混戰計
釜底抽薪 — 不敵其力,以消其勢,兌下乾上之象。
用法:如果你老細高調捉蛇,裝左好多偷聽器或閉路電視等高科技間諜儀器的話,你就唔好同佢正面作對,係鏡頭面前當然要有咁乖,就扮到咁乖啦!但當然唔會咁順攤屈服係惡勢力之下!首先要破壞儀器的運作,例如在辦公室煲水,又或者關掉冷氣機的抽濕功能,又或者搬東西時「唔覺意」將個鏡頭移開。總之,就係要「不刻意」地令這些儀器壞!

混水摸魚 — 乘其陰亂,利其弱而無主。隨,以向晦入宴息。
用法:趁亂蛇王。通常用於出外勤的時候,有很多人出入的環境下發生。很多時出去攪function嗰陣,你會發現 — 點解搵唔到d同事呢?因為,佢地去左蛇王囉!當你番到來,老細問你「點解剛才唔見你?」例牌的答案係 「唔係呀!頭先我係嗰邊做野!你睇唔到咩?可能太多人啦!」

金蟬脫殼 — 存其形,定其勢;友不疑,亂不動。巽而止蠱。
用法:呢招幾work,尤其適用於有制服的公司。當個個人穿同一樣的衣服,老細可能誤以為你去左影印或者pantry。如果你想更加安全,就試下將一件外套搭在一個較大型的Cushion上,有些「發雞盲」的老細會以為有人,就唔會理。有人試過,It works!

關門捉賊 — 小敵困之,剝,不利有攸往。
用法:老細要打蛇,最辣的招數就係「關門捉賊」,圍堵蛇竇就大家一命嗚呼。所以,大家選擇蛇竇要特別留意有幾多出口,又或者易不易逃脫。老細一入,眾蛇王就要從後門及通道溜走!如果蛇竇得一個出入口,老細一入,就一網打盡!

遠交近攻 — 形禁勢格,利從近取,害以遠隔,上火下澤。
用法:蛇王呢家野,最緊要離老細的視線範圍越遠越好!通常老細都係坐房,而且未必成日蒲出來。揀到個遠離老細視線的好位,蛇王當然無往而不利。但係,好位呢樣野,可遇不可求。如果個位係老細房前,點辦?就係在你的座位後面加個文件櫃,越高越好!一來風水上又有靠山,二來可以作為老細視線的屏障,一舉兩得。

假道伐虢 — 兩大之間,敵脅以從,我假之勢。困,有言不信。
用法:呢個在戰略上很難講如何蛇王,勉強說之,就是深化老細同蛇頭的憎恨,令到你老細的火力集中係佢身上。咁!你唔係可以「鷸蚌相爭,愚人得利」囉!

並戰計 偷樑換柱 — 頻更其陣,抽其勁旅,待其自敗,而後乘之。曳其輪也。
用法:老細最重要的人,唔係佢最得力的下屬,而係佢的秘書。一般來說,老細都好依賴秘書安排自己的日程。點樣令到一個得力的秘書成為百份百的「失魂魚」呢?係愛!找一個願意犧牲自己的壯男去識佢,然後等佢掛住拍拖,再分手令到佢求生不得求死不能!唇亡齒寒,老細都冇好日子過啦!

指桑罵槐 — 大凌小者,警以誘之。剛中而應,行險而順`。
用法:係老細面前,大大聲同同事傾計,讚第二個老細對下屬點好點好,又錫下屬,又俾佢地蛇王,聽到老細都覺得自己好唔掂。老細如果真係照單全收,大家的奸計就得呈啦!

假癡不癲 — 寧偽作不知不為,不偽作假知妄為;靜不露機,雲雷屯也。
用法:又叫「詐傻扮懵」。呢個係留係公司的天文台責任,當老細問佢其他蛇王同事係邊的時候,佢千祈唔好扮醒目,有條不紊咁講晒d「對白」比佢聽,要扮下野!仲有,天文台仲要好識隨機應變,要睇下老細的反應。如果老細有任何「打蛇」的意圖,要盡量拖延老細時間,問下佢野,又或者比野佢簽,好等佢地分散注意力,蛇王的同事亦能及時散水。

上屋抽梯 — 假之以便,唆之使前,斷其媛應,陷之死地。遇毒,位不當也。
用法:誘之以利,用少少的甜頭,去達到蛇王的終極目標!如果你老細係「燶丁」,你可以話比佢聽剪報頭,可以去百佳/惠康買野有折扣!如果驚佢推動力唔夠,仲可以剪埋個報頭俾佢。佢去超市排完隊,至少都有一粒鐘啦!如果你老細好賭,就要每期報料比佢聽今期多寶獎金係幾多……哈!好得架!

樹上開花 — 借局布勢,力小勢大。鴻漸於陸,其羽可用為儀也。
同客開會一個長會,緊係喺出面開啦,中間緊係蛇一蛇先啦!跟著,返到公司就同上司報告,誇大個客的不滿,講公司個plan覺得唔work既野出嚟,務求令上司唔好扯得你咁緊,可以抖抖氣。

反客為主 — 乘隙插足,扼其主機,漸之進也。
同其他部門合作,一早打定底先,出力討好對方,讚到對方飄飄然,然後不知不覺將自己的意思加插入去合作計劃,等佢部門老細同自己老細開會時,方便過關。就咁聽,好似無得蛇,但係如果一切由你意思做,咁你想點蛇都得啦!

敗戰計
美人計 — 兵強者,攻其將。將智者,伐其情。將弱兵頹,其勢自萎。利用御寇,順相保也。
用法:其實美人計都唔一定要利用美色,只係利用一啲可以令上司著迷的喜好,等佢不時放鬆下,佢放鬆咗,你仲唔係有機會蛇!

空城計 — 兵虛者虛之,疑中生疑;剛柔之際,奇而復奇。
用法:好好用的招數。如果有房,就不要關掉冷氣及燈,而且千祈唔好關掉電腦(最好就係開住個file,等人地以為你做緊嘢,去咗開會或上廁所),仲要將文件放在桌上。另外,如果有「晏番」或「早撇」的話,就要預備多一個袋,等人地以為你仲未走或已經番左嚟,咁就得米啦!

反間計 — 疑中之疑,比之自內,不自失也。
用法:上司的秘書就係你的間諜,上司的一舉一動,你都清楚知道,咁咪可以轉膊轉身快囉。好似知道上司放工有約,咪即刻約埋同事們放工即蛇!

苦肉計 — 人不自害,受害必真。假真真假,間以得行。童蒙之吉,願以巽也。
用法:臨有大project,即刻扮到趕工趕到病,然即缷左俾其他同事,仲蛇唔到!不過,呢招要小心用,更不要常用,否則輕則俾同事排斥,重則連份工都無埋!

連環計 — 將多兵眾,不可以敵,使其自累,以殺其勢,在師中吉,承天寵也。
用法:用呢一招威力最猛,亦都要聯合其他同事一齊做。一些同事要俾很多麻煩佢,一些同事又擦下佢鞋,一些同事又搧風點火…總之攪到佢永無寧日,精神分裂,雞毛鴨血…佢邊得閒理你。

走為上計 — 全師避敵,左次無咎,未失常也。
用法:三十六計最後一招,亦都係最簡單一招。一見老細打蛇,即刻鳥獸散,走為上著!唔通等佢捉咩?!

下期預告:
神秘…好神秘…明天就知囉!

[1] 仲又冇蛇王絕招

睇左毒蛇嚇機未?係唔係蛇出去睇?
要蛇出去睇先至夠high!^^


[引用] | 作者 剛仔 | 6th Sep 2006 | [舉報垃圾留言]